ಸತ್ತಂತೆ ನಟಿಸ ಬೇಕು

ನಾನೊಮ್ಮೆ ಯೋಚಿಸಿದ್ದುಂಟು ನಾನು ಸತ್ತಂತೆ ನಟಿಸ ಬೇಕು|
ಹಾರ ತುರಾಯಿಗಳ ಭಾರದಿಂದ ಬಳಲಿ ಹೋಗ ಬೇಕು|
ನನ್ನ ಬಂಧುಬಳಗ,ಸ್ನೇಹಿತರು,ಹಿತಚಿಂತಕರು,
ಸಾಹಿತ್ಯ ಕ್ಷೇತ್ರದ ಮಿತ್ರರು ಜಾತ್ರೆ ಯೋಪಾದಿಯಲಿ
ಸೇರುವುದ ಕಿರಿಗಣ್ಣಿನಿಂದಲೇ ನೋಡಬೇಕು|
ಅಣ್ಣ ತಮ್ಮ, ಅಕ್ಕ ತಂಗಿಯರು ಪತ್ನಿ ಪುತ್ರರು-ಮಿತ್ರರು
ಬಿಕ್ಕಿ ಬಿಕ್ಕಿ ಅಳುವಾಗ ಎದ್ದು ಚಕಿತಗೊಳಿಸಬೇಕು!!

-೨-
ಅದೊಂದುದಿನ ಸಾಹಿತ್ಯವೇದಿಕೆಯಲಿ ಕುಸಿದಾಗ
ನರ್ಸಿಂಗ್ ಹೋಮ್ ಸೇರಿಸಿ ಮನೆಗೆ ಸುದ್ಧಿ ಮುಟ್ಟಿಸಿ
ಕೈ ತೊಳೆದುಕೊಂಡ ಸನ್ಮಿತ್ರರು ಮತ್ತೆ ಅತ್ತ ಸುಳಿಯಲಿಲ್ಲ|
ಅಕ್ಕ ತಂಗಿಯರು ಅಣ್ಣ ತಮ್ಮಂದಿರು ಕರೆಯ ಸ್ವೀಕರಿಸಲಿಲ್ಲ|
ಉದ್ದುದ್ದ ಬರೆಯುತ್ತಿದ್ದ ಪತ್ರಿಕೆಗಳಿಗೆ ಸುದ್ಧಿಯಾಗಲಿಲ್ಲ|
ಬಂದವರು ಬೆರಳೆಣಿಕೆ ಜನ!
ಆರು ತಿಂಗಳಾಗಿದೆ, ಅಂಗಡಿ ಸಾಲ ತೀರಿಸಲಿಲ್ಲವಲ್ಲಾ!
ಹಾಲಿನವರ ಬಾಕಿ ಕೊಡಲಿಲ್ಲ ವಲ್ಲಾ!!
ಕೆಲಸದಾಕೆಯು ಬರುವುದನ್ನು ನಿಲ್ಲಿಸಿದರೂ ಹಿಂದಿನ ಬಾಕಿ ಕೊಟ್ಟಿರಲಿಲ್ಲ ವಲ್ಲಾ!!
ಬಂದಿದ್ದರು ವಸೂಲಿಗಾಗಿ,
ಆಫೀಸಿನಿಂದ ಬಂದಿದ್ದ ಪರಿಹಾರ ಮೊತ್ತದ ಹಂಚಿಕೆಗಾಗಿ!!